Cuireadh tús le Féile Chruite Acla sa bhliain 2017, nuair a shocraigh grúpa de dhíograiseoirí ceoil féile a eagrú a thabharfadh ardán don cheol domhanda is fearr anseo ar oileán aoibhinn Acla. Óir gurb í Laoise Kelly a smaoinigh air an chéad lá riamh, níl amhras ar bith ach go raibh an chruit chun bheith lárnach sa tionscnamh!

Féile bheo thar thréimhse trí lá a bhí sa chéad fhéile. Rinneadh an cinneadh an fhéile a reáchtáil go déanach i mí Dheireadh Fómhair de bharr go mbíodh tradisiún ársa ann go gcruinneodh cruitirí na hÉireann le chéile chun ceol a sheinm ag Samhain. Ag an am mistiúil seo den bhliain, is féidir le daoine a thugann cuairt ar Acaill sult a bhaint as an oileán ag am níos suaimhní nuair atá fuadar an tsamhraidh maolaithe. Bíonn cuma an fhómhair ar na sléibhte, na gleannta agus ar an bhfarraige, agus iad á réiteach féin do shéasúr na stoirmeacha. Tháinig na cuairteoirí agus thiteadar uile i ngrá lenár n-oileán álainn agus leis an gcultúr atá ann, ag meabhrú dúinn an t-iontas a bhaineann leis na gnáthrudaí agus ag cur dúshlán romhainn athchuairt a thabhairt ar aoibhneas shaol na hÉireann agus a cultúr uathúil. 

Thar na blianta tá fás agus borradh tagtha ar an bhféile nach rabhamar riamh ag súil leis. Chuireamar fáilte roimh an iliomad ceoltóirí, amhránaithe, damhsóirí agus scéalaithe ó áiteanna ar fud an domhain. Trí chultúir idirnáisiúnta a roinnt tá eolas agus spreagadh tugtha do lucht éisteachta arís agus arís eile. De bharr comhshaothair neamhfhoirmiúla ag an bhféile, d’eascair léirithe agus taifeadtaí den scoth. Thar rud ar bith eile, cuireadh tús le cairdis nua ag an bhféile, bunaithe i ngrá comhroinnte don cheol. Is ábhar bróid d’Fhéile Chruite Acla é sin.